ប្រព័ន្ធឌីវ៉ាត (DEWATS) គឺមកពីពាក្យថា “ប្រព័ន្ធប្រព្រឹត្តិកម្មទឹកសម្អុយតាមបែបវិមជ្ឍការ”

ប្រព័ន្ធឌីវ៉ាតគឺជាប្រព័ន្ធសម្អាតទឹកសម្អុយមួយប្រកបដោយការជឿជាក់ការចំណាយទាបនិងមិនទាមទារឲ្យមានការថែទាំច្រើន។ ប្រព័ន្ធនេះអាចសម្អាតទឹកសម្អុយសរីរាង្គឲ្យមានគុណភាពទៅតាមកម្រិតបទដ្ឋានបរិស្ថានពិភពលោក។

អត្ថប្រយោជន៍ចំបងនៃប្រព័ន្ធឌីវ៉ាត៖

• អាចធ្វើប្រព្រឹត្តិកម្មទឹកសម្អុយសរីរាង្គពី ១ទៅ១០០០ ម៉ែត្រគូបក្នុងមួយថ្ងៃ​ កាត់បន្ថយសមាសធាតុពុលពីសំណល់ទឹកសម្អុយតាមផ្ទះ ឬរោងចក្ររហូតដល់ ៩០ ភាគរយ
• ទុនចំណាយទៅលើការសាងសង់មិនខ្ពស់ និងដំណើរការ និងការថែទាំមានតម្លៃទាប
• បច្ចេកទេសប្រកបដោយការជឿជាក់ខ្ពស់ជាប្រព័ន្ធដែលអាចធ្វើជាគំរួប្រកបដោយនិរន្តភាព សម្រាប់ការដំឡើង និងសាងសង់ ប្រើប្រាស់សម្ភារៈក្នុងស្រុក
• ត្រូវការផ្ទៃដីសាងសង់តូច និងមិនតម្រូវឲ្យមានភ្លើងអគ្គិសនីសម្រាប់ដំណើរការ និងអាចផលិតថាមពលតាមរយៈឡជីវឧស្ម័ន។

ម៉ូឌុលប្រព័ន្ធឌីវ៉ាត (DEWATS) បួនប្រភេទដែលមានប្រសិទ្ធិភាព និងសមត្ថភាពបច្ចេកទេស ត្រូវបានបញ្ចូលក្នុងបទដ្ឋានបច្ចេកទេស។ អត្ថប្រយោជន៏បន្ថែម គឺ ម៉ូឌុលជីវឧស្ម័ន។ សមាសភាពទឹកសម្អុយ គឺអាចផលិតជាជីវឧស្ម័ន​ដែលអាចប្រើប្រាស់បាន។

តួនាទីចម្បងរបស់ប្រព័ន្ធ DEWATS ៖

អាងស្តុកញែក ៖ មានតូនាទីញែកសំណល់រឹង​និង​ភក់​ដែល​រង​ទៅបាត រង​កា​របំបែក​ក្នុង​លក្ខខណ្ឌ​គ្មាន​ខ្យល់

អាងចម្រោះបែបជីវសាស្រ្ត ៖ តាមរយៈ​ប្រព្រឹតិ្តកម្ម​ក្នុង​លក្ខខណ្ឌ​គ្មាន​ខ្យល់ ធ្វើឲ្យ​សំណល់​រឹង​​ដែល​​រង​នៅ​បាត​​ក្រោម​​រលួយ

អាងមានតម្រងចម្រោះ ៖ សមាសធាតុដែលជាសំណល់រឹងមានទំហំល្អិតតូចៗ មិន​ទាន់​​រលូយ​ត្រូវ​បាន​ត្រង​ដោយតម្រងចុងក្រោយ ហើយ​​​ទទួល​​រង​​ នូវ​​ប្រព្រឹត្តិ​កម្ម​​ ក្នុងលក្ខខណ្ឌ​ ​គ្មានខ្យល់ ចុង​ក្រោយ​មុន​​នឹង​វាហូរ​ចូល​អាង​ចម្រោះ​ផ្តេក ​ប្រើ​គ្រួស​​ជា​​តម្រង

អាងចម្រោះផ្តេកមានរុក្ខជាតិ ៖ ជាដំណាក់កាលប្រព្រឹត្តកម្មអែរ៉ូបិក ដែល អុក​ស៊ី​សែន​ដើរ​តួនាទី​សំខាន់​ក្នុង​ការ​កាត់​បន្ថយ​សារ​ធាតុ​ចិញ្ចឹម

ប្រព័ន្ធឌីវ៉ាត (DEWATS)  អាចសាងសង់សម្រាប់សម្អាតទឹកសម្អុយ ឲ្យមានគុណភាពទៅតាមកម្រិតបទដ្ឋាន នៅគ្រប់លក្ខណៈស្ថានភាពដី និងទៅតាម លទ្ធភាព ព្រមទាំងការចង់បានរបស់អ្នកប្រើ។ ពុំមានទាមទារប្រើភ្លើងអគ្គិសនី បើសិនជាស្ថានភាពដីមានជម្រាលគ្រប់គ្រាន់ដែលអាចធ្វើឲ្យទឹកហូរតាមទំនាញផែនដីបាន។

ប្រព័ន្ធឌីវ៉ាត (DEWATS) សម្អាតទឹកសម្អុយប្រកបដោយជោគជ័យនៅតាមមន្ទីរពេទ្យ សណ្ឋាគារ និងទៅតាមសហគ្រាសកសិកម្មជាច្រើន រួមទាំងកន្លែងសត្ត-ឃាត សិប្បកម្មផលិតតៅហ៊ូពីសណ្តែកសៀង រោងចក្របិទស្រា និងស្រាបៀរ និងកន្លែងបង្កាត់ពូជសត្វផងដែរ។ អាជ្ញាធរមូលដ្ឋាន និងសហគ្រិនខ្នាតតូច និងមធ្យម បានទទួលសេវាពិគ្រោះយោបល់ពី ESC-BORDA Cambodia ក្នុងការគូរប្លង់ ផ្តល់សេវាត្រួតពិនិត្យ ការសាងសង់ តាមរយៈការអនុវត្តគម្រោង។

ប្រព័ន្ធឌីវ៉ាត (DEWATS) ចំនួន២,០០០ ត្រូវបានសាងសង់ក្រោមការត្រួតពិនិត្យ ពី BORDA។ បុគ្គលិក កម្មករ មកពីស្ថាប័នឯកជន រដ្ឋាភិបាលនិងអង្គការសង្គមស៊ីវិលចំនួន១,០០០នាក់ បានទទួលការហ្វឹកហាត់លើការផ្សព្វផ្សាយបន្តចំណេះដឹងបច្ចេកទេស ការអនុវត្ត និងការថែទាំប្រព័ន្ធឌីវ៉ាត។